وٓدْرت
اليوم الأحد يوم الحمام ، مشيت فالصباح باش اكون خاوي المهم شافتني الضاوية
الطيابة جات عندي غمزاتني قولت ليها اًوكي بالرأس (مو دو پاس يعني هي لي غادي تحك
ليا)
الضاوية عندها شي خمسين عام تبان عليها ستين مزوجا بواحد مخدامش ، عادي ، و عندها
ربعا ديال الأولاد ،مصيبة. او ساكنة في كاراج !! هاد شي لي جعلني نقول ليها او هي
كتحك ليا : الضاوية ، نعم أ لحبيبة ، قولي لي آش داك لربعا ديال دراري و نتي ملي
تزوجتي مخدم راجلك تا نهار او ساكنة في كاراج ؟؟ إيييوا هادا ما كتب عليا الله ،
لا ضاوية الله ما دخلش فهاد شي !!
راه تاوحد مالقاها كيف ما بغاها ، شوفي هاديك لي لهييه ، مالها ؟ ( هنا تحركت حاسة
الفضول )
راه جراو عليها من فرانسا مسكينة زايدة تماك جات بحال شي حمقى ، علاش آش دارت ؟
الضاويااااااااااااا .. نعام ، أجي ، سمحيلي انا جايا ؛ ذهبت و تركتني على نار
مالها المسكينة ماذا فعلت ؟ هل طبق عليها دوبْلْ پِنْ ؟ هل كانت من مولات جهاد
النكاح ؟ هل أتى بها والدها و تركها بدون أوراق لانها كانت ستتزوج فرنسي ؟ المهم
راسي ضرنيييييي تا جات الضاوية ؛ لحبيبة ديالي سمحيلي بزاف راه جات مرات الكومي
سير او كتبغي نحك ليها غير انا وخا راه متعطيني والو ولكن انا غادي نصيفط ليك
سميحة .
خرجت من الحمام حازمة راسي معرفتش القصة و مهزومة من طرف مرات الكوميسير.
الضاوية 1
جات عندي الضاوية ليوم حيت انا ساكنة غير حدا الحمام ، وصاط ليزونفون ملي ايشوفوني
دخلت من الخدمة ايقولوها ليها ، المهم جاءتني بواحد لوجه حمر حتى صفار ! اهلًا
الضاوية لاباس ، كيدايرا خْتي يمينة لاباس ، الحمد لله ، ( المهم راجلك الخدمة
الجيران الصحة المورال عاود ياك لاباس ، سبعة او سبعين لاباس باش نتأكدو مزيان ،
حْنا ملين الخير)
فرحانة انا غادي تكمل ليا القصة ، خْتي يمينة ، نعم الضاوية ، رني قصدتك و المقصود
هو الله ، ياك لاباس ( تْمنية او سبعين) ؟
آه يا خْتي لعزيزة نتي راكي معروووفة مزيانة او مفيكش تخلويض ( الله على مقدمة هاد
شي فيه شي قضية كبيرة)
اوا الحمد لله !!
شوفي لالا يمينة (نري) تعرفي اختي فطوم ،راه جات عندي من لبلاد هادي خمسة شهور،
إييييه عرفتها أو سكنات معاك فالكاراج، مالها؟ آآآآه الحبيبة فضحتني بهدلتني
الغولة آويلي آويلي (بدأت الضاوية تبكي و تندب تبكي و تندب )
آش كاين قولي ، راها حاملة !!! ويلي كيفاش ؟ لا يعني معامن ؟
جا مولا داري غير في هاديك الدقيقة دْخل شاف فالضاوية من جنب مشنكر تقول هو الأب
ديال فطوم.
المسكينة فهمات راسها ، شوفي نرجع عندك من بعد مشي للحمام دابا راها جايا مرات
لمقدم راكي عارفة شكامة بحال راجلها و انا عندي لٓغْوال ماشي اولاد .
واخا روحي الله إعاونك ، يميننننااااااااااا انا جايا
واش منتغداوش !!
تفوو تاكل السم نشاله ، بسلامة الضاوية تال بلاتي
و رجعت الى المطبخ راسي ضارنييييييييي او قلبي ضارنييييييييي مسكينة الضاوية !!
....................................
لضاوية 2
ذهبت للشغل و انا مشغولة بالضاوية ، الزُّغبِيّه آش هاد ازهر لي عندها، موصلت ديك
الربعة او نص حتى عقلي تبلوكة ؛
نمشي عندها نيشان للحمام ، نعيط بعدا لعزرين باش ميحيحش ؛ آلو هادي انا راني غادية
للجمعية عندنا حالة مستعجلة ،
متعطليش باش نتعشاو بكري ،
غادي توجد شي حاجة ؟
مادام غادية تشيخ او انا نوجد لعشا تباركلاه !!!
المهم..... بسلامة (غير ستنا حتى نسالي معا ضاوية او نتبالا بيك، كونت غادي تموت
باش تتزوج بيا او دابا...)
وصلت الحمام فدخلت سالت عن الضاوية لم تكن موجودة !!!
سميحة مكتعرفيش في ساكنة الضاوية ؟
سكنة ف حي الأمل ، راها مشات بكري النس لي عطيين ليها الكاراج جايين غدا مشات تسيق
ليهم الدار او تفرشها او تعجن ليهم ، راكي عارفة دايرين فيها الخير ، بصح عندي
نمرتها الا بغيتيها نعطيها ليك
واخا شكرًا .
عيطت على الضاوية او لحقت عليها لدار ، لقيتها في حالة الغديان مسكينة كلشي مقلوب
واحد الدار كبيرة او عامرة بالاتات ، خدامة هي او ختها او زوج ديال ولادها او واحد
التالت كيضرب فازرابي معرفتوش . هبطاط الضاوية رحبات بيا دخلنا للكاراج لي ساكنة
فيه كان عبارة عن پياسة وحدة مقسومة بلوحات : كوان المطبخ كوان الصالون لي هو نفسو
غرفة النوم ديال لولاد كوان صغير فيه سداري واحد او فيه كتب كتيرة ، تجهت ليه
نيشان ، هنا ينعس محمد راجلي مسكين مزيا لاقي هاد الكتب ،
او نتي فين تنعسي ؟
معا لولاد او لْغولة لي بلاني بها الله ، جَلسي يمينة خْتي مراحبا بيك
شكرًا الضاوية ، مالكي على تامارا هادي بشويا بشويا
اوا خْتي الناس لي دائرين فينا الخير جايين غدا مكيعلموناش بكري ديما هاكدا
اواقوليها ليهم
لا منقدرش
المهم خلينا من هاد الموضوع ، قولي لي شكون لي معا ختك في العملة ؟
السلام اهلًا
السلام اهلًا بك
محمد راجل الضاوية
متشرفين خويا
شعور متبادل
هادا هو لي كان ينفض زرابي
الضاوية جَلسي مع السيدة غادي نساليو
الله اخليك ليا
تا نتي ، سمحيلي مدام مرة اخرى و قبلي علينا
راني في داري شكرًا
راجلك إبان مزيان
بزاف اختي مسكين غير معندو زهر ، ملي اسمع بالمصيبة ديال الغولة او هو مريض
عندو لخبار ؟ مجراش عليها ؟
عندو !! يجري عليها ؟ متعرفيييييش محمد راجلي راجل مناضل ضحا بشبابو من اجل بلادو
يبغي الخير لناس او فاهم او واعي ، قال لي ملي شافني نجدب ، الله يهديك أ الضاوية
واش نحلو المشكل او نعقدوه كالمي راسك تا نلقاو مخرج لپروبلام .
تبارك الله !! اوا شكون لي ....؟ قالت ليك او لا ؟
قالت
مااااااا
نعاااام
خالي مصطفى
ناري يا لحبيبة قطعي هاد الموضوع راه بذبحها
صافي تال غداً دوزي عندي اداري دابا نمشي
هدا علام عشرين فبراير ؟
واااااه اختي زوج من ولادي خروجولي بحال باهم !!
تبارك الله الله يحفضهم
الكبدة ديالي ديما مقطعاتا يدخلو عاد نتهنا , و الله حتا تدي هاد الملويات ديال
الشحمة راني درت بزاف وجدتهم
واش نطمع فيك الضاوية !!! ربي يخليك
مشيت و انا مذهولة و مقلقا و قتاش اجي
..............................................
لضاوية 3
دخلت لدار جاتني كبييييرة درنا مطبخ او باش منوسخوهش درنا مطبخ ثاني درنا صالون او
باش منوسخوهش درنا صالون ثاني و الاول ديما مسدود
عثمان ولدي لكبير عندو بيتو و نعمان عندو بيتو كل واحد ساد عليه انا في المطبخ مع
الموسيقى و النيت و مسلسل العشق الممنوع و رشيد زوجي في الصالون مقابل الجزيرة
المجرمة أو لغوات !!!
آش هاد الحياة لي نتي فيها يمينة ؟ فين هو الحب فين هي العاءلة ؟ فرق كبير بينك او
بين الضاوية !!
الله ينعل الشيطان !! الضاوية مسكينة عايشة الجحيم و انا غرت منها ؟ يمكن داك
الاهتمام ديال راجلها و داك لكلام زوين !! إيه هو هذا عندنا كولشي ولكن نقصنا
المهم ،
طلعت الغرفة ديالي خديت واحد العلبة مخبيا فيها مساءل عزيزة عليا خرجت رساءل رشيد
لي كان يرسلها ليا قريتهم او جاني الحنين الى الماضي ايام الجامعة ، خديت الهاتف
ديالي و كتبت مقطع من رسالة في س م س ، كان يقول : "حبيبتي اين انت منذ
افترقنا و انا بدون قلب ولا عقل توحشتك وقتاش اجي غداً باش نكون معاك "
ترسمات ابتسامة خفيفة على وجهي كما لو انني لأول مرة اقرأه ، ثم بعثت س م س لرشيد
زوجي و انتظرت الجواب ..
درن درن درن : الجواب ، ناري قلبي كيضرب مبغيتيش نشوف خفت حليت عيني و انا اقرأ :
خالتي اذا ما ممكن تتصلي بأمي
كان س م س من الضاوية !!!!
آلو يمينة عتقيني آختي ولدي ضرب خالو حنا دابا فالكوميسارية
صافي لاحقة عليك
يا لطيف مشاو يقتلوها
رشيد انا غاديا للكوميساريا
اًوكي
خرجت و انا نفكر في الضاوية و كيف غادي نحل المشكل
.............................................
لضاوية 4
وْصلت الكوميسارية دْخلت نقلب على الضاوية بانت ليا ختها جات عندي ، كان وْجها صفر
و شنايفها بويض أكيد انها في حالت فقر الدم ، حاملة و في مصيبة ، المهم سولتها
شرحت ليا انه ولد ختها صغير داير مع خالو ناض هو صفعو جا الولد رد عليه الضرب مخلا
فيه مايتشاف .
الخال شكا بولد اخته او طالع فسْما مستحيل يتنازل .
بغيت نفهم علاش دابزو ، حكات ليا الضاوية :
يمينة خْتي هدا خويا الوحيد مصطفى كاينة غير انا أو هو و الغولة ديال اختي المهم
الوالدين ماتو خلاو لبلاد بزاف ولكن مصطفى مبغاش يعطينا حقنا قال لينا منفرقوش
رْزقنا و المشكل حْنا مكنشوفو والو و ليوم راه جا قال ليك اخلي ولدو عندنا يقرا
هاد العام الداخل و انتي عارفة الحالة ناض ولدي نضال قاليه أخالي الله يهديك فين
غادي أيزيد ولدك ؟ خصك تفهم بلي بلاصتنا راحنا قسمناها معا خالتي لي جرات عليها
مْراتك ؟
من بعد خرج ولدي نضال ، بْدا خويا كيعاير و يخصر لهضرا معا محمد راجلي و. المشكلة
جمال ولدي لي راسو سخون تا هو ناض تزايدو او ضربه لْمصطفى إوا هو كان موجود مخلا
فيه والو .
- قدم شيكايا ؟
- إيه
- فين هو ؟
- راه معا محمد
مشيت عندو، واو يا لطيف مخلا فيه مايتشاف المهم حاولت معاه او حاولت او حاولت ، و
لكن والو .
- سي مصطفى راه حشومة انت عايش مبرع و تخلي خواتاتك فهاد الميزيرية أو زايد دخل
الولد للحبس !!!
- ألالا شكون نتي بعدا حنا فضوارنا لمرا حشومة تورث أو هادا راه مصخوط خلي باباه
يتربا
- شوف انا محامية او عضوة في جمعية حقوق الانسان ، الا متنازلتيش غادي نرفعو عليك
دعوة باش تقسم الورث او منهار ماتو الوالدين تحط نص كل ما خديتيه
- إيه يا ضاوية على خٓرْ يّامي وليت نتبهدل او نتهدد !! إوا شوفي فهاد لوجه هدا
نهار تالي لتشوفيه .
- الله يهديك أسي مصطفى نتا على راسنا من فوق
- سد فمك نتا سير ربي ولاك ، انا غادي نتنازل ماشي خايف و لكن على وجه الدم .
تنازل لْمصطفى و خرج جمال و تْهنات الضاوية ولكن لفطرة صغيرة .
لْمصطفى شد جْتو صغيرة و داها معاه
- آخويا ها العار خليها معايا
- يعطيك لَخْلا و دْرا معندك خو او هادي ترجع لدار تا طروح لدار راجلها
الضاوية سخفت طاحت على الارض تبليسات فراسها دمها بقا
.............................................
الضاوية 5
مبغات تا طاكسي تحبس لينا و لا شي طوموبيل بقينا حاصلين ، الضاوية فاقت ولكن راسها
مبليسي دم تايسيل زوجها مقدرش يصبر هزها في ضهروا وبقا تيجري في الاتجاه ديال
المستعجلات و حنا موراه الحمد لله المستشفى ماشي بعيد بزاف ، وصلنا لباب المسعجلات
وٓقّفنا واحد السيد
-السلام ، مالها ؟
- فقدت الوعي أو ملي طاحت تبليسات
- مسكينة ، دخلوا شوفوا واش كاين شي حد
- طبيب كاين بعدا؟ "سوله نضال ولد الضاوية
- مانعرف سيرو سيرو
دخلنا شي ريحة مقرفة شي حيطان كلهم طايحين البيبان موسخين شي ناس جالسا تستنا
تتوجع ، جات عندنا سيدة بالطابلية محتجبة
- السلام مالها ؟
عودنا القصة
- مسكينة !!! إوا جلسوها و ستناو طبيب راه مكينش
- وقتاش ايجي ؟ (سول محمد راجل الضاوية )
- ما عرفاش نتوما و زهر كم
- نتي ممرضة ؟ سولتها انا
- نعم
- متقدريش تشوفي شنو عندها ؟
- لا لا انا منقيسهاش !!!
ستنينا ساعة و مكناش لوحدنا ناس مريضة تنازع دراري صغار كيبكيو ، واحد لبنية كلها
مخبوشة عامرة حبوب ، ماماها تتبكي قالت انها سيات كولشي مشات تال المسجد أو رولات
بنتها فل الحصيرة ديالو ، البنت كانت غادي تموت ....
كان هداك المكان حزين و مألم لا رحمة و لا شفقة لا تأدية الواجب بحال الا كنا في
حالت حرب او في كوكب تاني ، متحملتش بديت كنتكلم مع نضال،
- خالتي مشفتي والوا !! هاد الناس خرجنا نطالبو بحقوقهم و حقوقنا و لكن تخلاو
علينا و جاو الاستغلاليين ايركبو على الحركة !! مصيبة كبيرة أو ما غادي تتغير الا
بالنضال و الثورة
- تبارك الله عليك اولدي
- ربي اخليك خالتي
افتكرت رشيد و اتصلت بيه حكيت ليه كلشي و قطعت من بعد قليل من الوقت تاصلت بيا
صديقتي الدكتورة ماجدة
حبيبة علاش معيطتيش ليا ؟ انا صيفط ليكم لي غادي اجيبكم عندي
مشينا عند الدكتورة ماجدة لي هي كذلك عضوة في الجمعية معانا و صديقة عزيزة تكلفات
بكل شيء شركتها و خرجنا و صلنا و بدينا مفكرو كيفاش نرجعو اخت الضاوية ، حكات ليا
الضاوية شنو داز على ديك البنت .
- الضاوية شكون لي ...مع اختك ؟
- قربي نقوليك
قربت الأذن ديالي عن فمها تكلمت و القلب ديالي كان غادي يسكت
الله يا ربي !!!!!!
........................................
ضاوية 6
جلست ما فاهما والو ،
- الضاوية فهميني آش كاتقولي !!
- محمد الله يحفضك تقدرو تخليونا بوحدنا ؟
- طبعا حنا غاديين للقهوة ، مع السلامة اخت يمينة و سمحي لينا بزاف
- هذا واجد اخي محمد و الضاوية راها صديقة
- لهلا يخطيك عليا خْتي يمينة
مشاو بقينا راسنا في الدار ، اقصد الكاراج ، الضاوية متكيا الوجه ديالها ازرق
عيناها بالبكاء ولاو صغار ، الدقان فالباب ،
- نعام ؟؟
- الضاوية هدا انا جبت ليك هاد الموز و دانون كوليهم باش يعطيوك غليكوز راپيد
- شكرًا محمد ولكن مافيا ما يكل
- لا الضاوية لابد يلاه مغديش نديرنجكم من بعد
متعجبة انا ،علا تصرف راقي و إنساني !!و فيه حب ، شكون هاد السيد شكون هاد الزوج
لابد ان استمع لحكاية حياته ولكن من بعد الان المهم عندي هو مصيبة اخت الضاوية .
- كولي راه راجلك عندو صح و من بعد حكي لي كولشي راه مصيبة كبيرة هادي
- نعام اختي يمينة ، مصيبة ، هاديك البنت مسكينة من صغرها او هي فالمحاين
- حكي لي كولشي
- مِي ولدتنا بتلاتة او حبسات عيات تجري والو قال ليها فقيه الضوار راه دارو ليك
سحور ربطوك باش متزيديش او دفنوه فشي بلاصا او لوكان منلقاوهش او نحلوه راه معمرك
تولدي ، المهم كلا بها لفلوس تا مقد واحد نهار قال ليها راه جاو عندي لجواد قالو
ليا بنتها صغيرة هي لي توريك لمكان خدمها تا تتكلم ، اوا ديك الساعة خْتي كان في
عمرها عٓشْرْ سنين داتها ليه مي بلا خبار الواليد كانت تخليها معاه ساعة من بعد
ساعتين البنت ولات متتكلش و متلعبش تبدلات وحد نهار مسكينة بدات الطيح بْلرْياح
صافي مي خلا تها و بدات تاكل كل ما قالولها تا مرضات او ماتت او الواليد زوج خويا
و انا تزوجت بمحمد رحلت لمدينة و با الله ارحمو لحق مي او بقات خْتي مع خويا نهار
مريضة نهار لا مراتو خايبة معاها ديما طيح ايجيبو ليها لفقيه لي هوا نسيب ديال
خويا ، كتهرب عندي كيجي يديها خويا باش تعاون مراتو فدراري متزوجتش لان كولشي
عارفها مقيوسة تا لواحد نهار ... سمحيلي نشوف شكون فتيليفون
- آلو لْمصطفى نعل الشيطان خلي البنت معايا
-
- اويلي اويلي ختييييييييييييييييي
..................................................
الضاوية
"الاخيرة"
كان الصهد و الريح او لعجاج السماء مْرونا بحال الا كانت هاملة ... لعيالات
كيوشوشو كلام و عينيهم على الضاوية ، دواري اصغار بزااااف كيجريوْ و يْغوتوا ،
الرْجال مكيبنوش ولكن هضرتهم كتسمع كانت فوضة مختلفة عن العادة ... الضاوية حازمة
راسها مْتكيا او الدكتورة ماجدة كتقيس ليها الضبط كلنا معاها جينا كاملين مكانش
ممكن نخليوها بحدها في هاد المصيبة الكبيرة لي ماعندها حل ...
- دكتورة ، ياك نتي دكتورة؟؟
- نعام انا دكتورة
- الله اخيلك راني مريضة بالكرش ديالي
- سمحيلي لالا انا هنا باش نتكلف بالضاوية
الدار كانت كبييييرة او عامرة ولكن كل واحدة أو واحد جا غير باش ابركك او ياكل ،
جاني لعطش ولكن مبغيتش نشرب الماء بحال الا كل الماء ديال الدوار ملوث بالدموع
ديال فاضمة اخت الضاوية ، ياااااه شحال صعيب الفراق و مر و شحال كانت فاضمة ضعيفة
تال حد القوة لي جعلتها في هاداك نْهار ترمي راسها فلْبير علاش زربت علاش مخلتناش
نساعدوها ؟ و حْنا كنا نقدرو نْديرو شي حاجة ؟ صعيب بزاف .
لفقيه احلل و يحرم :
- الروح عزيزة عند الله و هته الفتاة جعلت حد لحياتها و هدا حرام و ستذهب بدون
صلاة !!
المجرم القاتل ، في الاول حمقها بالشعوذة ديالو و من بعد بدا يغتصبها كلما أراد و
الغريب ان كل واحد كان حتي بانه كاينة شي حاجة ماشي عادية ولكن تاحد متكلم .
محمد و نضال و رشيد زوجي جاو من المدينة و جاو معهم سيارات كانو صاحبهم و مناضلين
و شباب جميل قرروا ايصليو على المرحومة و ابنها صلاة الجنازة ، كان ذلك في أشد
القسوة و الحزن بكينا و صلينا في هدوء و صرخنا كاتمين اصواتنا ، صرخنا غضبا على
التي ذهبت ضحية الجهل و الحرمان و الطمع و الإهمال ، حتى البوليس مبغاش إيقيد
الدعوة ضد لفقيه ، قالو لينا مكينش تا شي دليل أو لْمصطفى مبغاش لهضرا تخرج باش
ميبهدلش وجهو !!! و ماتت فاضمة و دفنت و تنسات و لفقيه في جنازتها قلب على لي غادي
تبلاصيها .
فاتت ربعة أشهر رجعت الضاوية تخدم فالحمام .
نهار الحد مشيت نتحمم لقيت لافتة مكتوب فيها : ممنوع إعطاء اكثر من عشرة درهما
للطيابات .
- الضاوية أش داك شي لي كتبت مولات الحمام ؟
- إوا هانتي شايفة حسدونا تا فهاد لعرق لي نازلة ، معليش خلينا هم لله
