باقي جاي كثرْ

المرفودة قصيدة بكْمة

الكسدة ملغومة

طوّل الشّوفة فيها

تعرف سر الدّمعة المبحوحة

تعرف آش جاب العمر

وعلاش غاب

علاش قواوْ الجْناوة

وجدبو عيساوة

كثرْ التّعداد

على وليّه مقهورة

موشومة بالصبر

والصبر إيلا غاب

تغيب الضحكة الملمومة

فْ  كَاشوش كان...

زاهر بالورد وبلّعمان

ولويز وقَروش

شكون خْوى الكْاشوش من العطوف

حتى عاادت القصيده بكمة

مخبلة بكبال

رشْكْتْ فيها َرشْكْة الهمْ

شكون,سرق غلّة الحوْش

كانت تعَيّشْ قومان

وسط اللغى وشكون وشكون

كثر البكى والنواح

حتا برّح البرّاح,

واااانوضي

واهي المشمْرة فالسّروِيّة

سولفي,حنّي وطْلي

شعْشعِي صوف المزدِيّة

قرشلي خيوط الشمس ف الغُبْشِيّة

جرّيها لخيمة بوك

راه طل الصباح

لمّي ما بقا ليك فْ  الصّبر

زادوك كثرْ

زادوك" فصل" بالجهرْ

كًد ما جااا    فْ حقّك

باقي يجيك كثرْ

وعند التطبيق يبان لي حسدك وغدرْ

لا تقولي هذا جارْ

هذا دارها بلعاني وكفرْ

سدّي فّام لسعاتك

عطيها بالظّهرْ

باقي يجي الخير وكثرْ

تجيك الميم:مكْودة مكمولة على هجهوج الحال

تقول ..الله يزيد كثرْ

هالرا..مكْضرة مربوعة القدْ تحل لك الباب

اللّيف يكْمُزْ ,هامولات السّالف خلّوها تبان

والتّا,تهيّت..تصْنع من الفرحة تيجان

وخرّْجَتْ القصيدة ضحكة ورا ضحكة كِ الغوتاتْ

تبعو الكذاب حتا  لبابْ

حتا تقاد الكتاف

تساوى الكفوف

وشوف تشوف

ايلا دارها بلعاني

تاني

كسى الكسدة طُعمة

بلا مايشعشع الصّوف

حتا وَلاّ لْحَمْها معيُوفْ

لا قْيني مع الصبر

لا قيني

تشوف الشمس ناشرهْ جْناحها

فْ زماني

بْلا حروز هازّه العلامْ

نسكّْد طريقْ

نحفرْ الصخر

تبان جبهة بلادي

نصبر على الضّرٌ

على قلب وجع

كفر

حكْرْ

كوّش على حلمة

جاية تكْبَرْ

ونْكرْ

ورجعت الشمس تنشرْ

 خيوطها تاني

وكبرت الحلمة

ف زماني بلعلالي

تعيّط

آآآ مولات السالف باني

هذا نهارك

هذا يومك

يوم التحالف المدني
                                     بقلم الزجالة المبدعة: بهيجة بنار